飛機佬，唔建議交易！我到咗約定地點交收，你先同我講你唔要？六月十幾號你搵我話對遊戲賬號有興趣，我見出價ok就接受咗，加上見你幾有禮貌，仲係學生，就冇收你定金，結果你拖住唔交易，又話要考試，又話試後活動，我話時間地點全部都可以就你，你先同我坦白你未夠錢，我開始有少少嬲，但你都仲係幾有禮貌，我都冇太在意。本身約旺角，你話唔識去，ok我就你，最後約咗7月4號下午四點荃灣交收。我住喺南區，我提前兩個鐘出門口，等咗你15分鐘，臨近4點你都未出現，我就開始打電話比你，結果你電話唔聽，信息唔睇，後嚟終於睇咗信息，但係講咗句「不要了,有更好的選擇」 ？？？拖咗咁耐你先話唔要？浪費我時間，兩個鐘頭，我專登去荃灣交收，車費都唔平，你竟然同我講唔要？你早兩個鐘頭講我都唔會咁嬲，你話通知過我，我完全冇收到你嘅信息，之後仲開始玩失蹤，最重要係你連一開始嘅禮貌都冇埋，我到咗之後先放我飛機，一啲歉意都冇？